ri-Marko-j • re-Mark-s • Marka-ntnosti - Day

5:57PM - Alia naskiĝdatreveno

Nur kelkajn tagojn post la centa datreveno de la naskiĝo de Kurt GÖDEL, jam hodiaŭ denove oni rememoras jubilean naskiĝtagon de alia fama moraviano - pri kies moravia (resp. ĉeĥa) deveno tamen preskaŭ neniu konscias...

Ĉi-foje temas pri Sigmund FREUD, la fondinto de psiĥanalizo kaj unu el la plej famaj psiĥiatroj tutmonde. Li naskiĝis je la 6-a de majo 1856, do antaŭ precize 150 jaroj, en urbo Příbor en nordorienta Moravio, ne tro for de Ostrava. En lia naskiĝdomo en tiu urbo troviĝas monumento kaj la retpaĝaro de la urbo enhavas plurlingvajn artikolojn pri lia persono.

Estas interese, ke plej ofte li estas konata kiel aŭstra psiĥiatro (tiel nomas lin interalie la angla vikipedio kaj simile ĝis hodiaŭ faris ankaŭ la esperanta vikipedio). Tion mi tamen ne opinias prava, des malpli ĉar la ligilo de la vorto "aŭstra" en la esperanto-vikipedio iris al artikolo parolanta pri la hodiaŭa Aŭstrio ("Republik Österreich"). Se jam paroli pri nacieco, laŭ mi plej bone estus diri ke li estis germanlingva judo (cetere same kiel multaj aliaj famuloj loĝantaj en la tereno de hodiaŭa Ĉeĥio). Estas interese rimarki, ke la germanlingva vikipedia artikolo entute ne mencias en la enkonduka frazo lian devenon, kaj la ĉeĥa diras anstataŭe ke li estis viena psiĥiatro. Mi decidis kopii tion lastan por la esperanto-vikipedio, ĉar ja informo pri la urbo kie li vivis kaj laboris ja estas nepridubinda kaj samtempe daŭre permas al oni derivi en kiu lando de tiama mondo li vivis.

Ĉiukaze, mi sentas sufiĉe interesa tiun ĉi kvazaŭ-hazardan kunvenon de pliaj gravaj datrevenoj de famaj ĉeĥdevenaj germanlingvanoj kaj pensas, ke tio ĉi ŝajne jam baldaŭ finfine igos min verki iom pli ampleksan trarigardon pri tiuj ĉi homoj por publikigi ĝin en /:kune:/, la kuna gazeto de la aŭstra kaj germana esperanto-junularoj. Tia medio (esperantista kuna aŭstra kaj germana gazeto) laŭ mi estas la plej taŭga elektebla medio en kiu mi (taŭga ke ĝuste ĉeĥo povanta al siaj najbarlandanoj atentigi pri ĉeĥaj radikoj de iuj iliaj famegaj "samlandanoj") referi pri tiu temo. Dependas de kiam mi finfine vere verkos tion, sed miaopinie ankoraŭ ĉi-jare ĝi povus aperi.